Десетици рудари од Трепча кои останаа заробени стотици метри под земја поради дефект во снабдувањето со електрична енергија утрово се извадени без повреди, објави КосоваПрес.

Рударите од втората смена на Трепча го напуштија рудникот утрово, пред околу три часа, откако беа заглавени околу 7 часа.

Инцидентот се случил како резултат на дефект во снабдувањето со електрична енергија, кој ги спречил да го напуштат рудникот.

Раководителот на Синдикатот на рудари, Ибрахим Јанузи, изјави за КосоваПрес дека во времето кога разговарал со медиумите, немал целосни информации за ситуацијата.

„Поради дефект во електричната енергија, втората смена останала заглавена. Немам многу информации, бидејќи сè уште не сум известен од никој. Ова го разбрав и од вестите“, рече тој.

Порталот потсети дека на 11 јануари оваа година, како резултат на прекинот на електричната енергија во рудникот, петмина вработени останаа заглавени околу 8 до 9 часа.