Иранскиот министер за надворешни работи, Абас Арагчи, порача дека Иран не се плаши од американските и израелските закани бидејќи за нив не постои воено решение. Тој нагласи дека „другата страна“ мора да бара решенија надвор од воената арена, бидејќи Иран нема да се покори, објави Ал Џазира.

Истовремено, Доналд Трамп изјави за „Фокс њуз“ дека за време на средбата во Пекинг, кинескиот претседател, Ши Џинпинг, го уверил дека Кина нема да му испорачува воена опрема на Иран. Трамп повеќе зборуваше за договорот за авиони „Боинг“.

Трамп: Кина нарачува 200 авиони од „Боинг“

Според Трамп, Ши истакнал дека Кина сака Ормускиот Теснец да остане отворен поради увозот на нафта и понудил помош за постигнување договор.

Кинеското Министерство за надворешни работи во официјалното соопштение не ги потврди конкретно овие тврдења, наведувајќи само дека се разговарало за „клучни меѓународни прашања“, вклучувајќи го и Блискиот Исток.

Откако започнаа нападите на САД и Израел на 28 февруари, Иран значително го ограничи сообраќајот низ Ормускиот Теснец. Блокадата на иранските пристаништа од САД, воведена неколку дена по договореното примирје на почетокот на април, ја продолжи кризата во водниот пат што пренесува една петтина од светската трговија со нафта и природен гас.

Не беше веднаш јасно колку овој потег ќе ја промени ситуацијата на терен, со оглед на тоа што Иран веќе за време на војната посочи дека неутралните бродови, особено оние поврзани со Кина, можат да поминат низ теснецот ако се координираат со иранските сили.

Податоците од следењето на бродовите покажаа дека кинески супертанкер што превезувал два милиони барели ирачка сурова нафта поминал низ Ормускиот Теснец во среда откако бил блокиран во Персискиот Залив повеќе од два месеци поради војната меѓу САД и Иран.

Иран: Планот за „паметно управување“ со Ормускиот Теснец e финализиран