Спасувачките екипи бараат преживеани во Индонезија по смртоносното уривање на тони отпад на најголемата депонија во земјата во близина на главниот град Џакарта.

Инцидентот се случил во неделата во интегрираниот објект за управување со отпад Бандаргебанг во градот Бекаси, Западна Јава, кога огромен куп ѓубре се урнал по обилните дождови што врнеле ноќта, пренесува Аваз Војс.

Властите првично објавија дека четири лица загинале, но спасувачите подоцна пронајдоа уште една жртва, со што бројот на жртви се зголеми на пет. Во меѓувреме, потрагата по исчезнати лица продолжува.

Според спасувач вклучен во операцијата, вкупно 13 лица биле на местото на настанот во моментот на уривањето.

„Четири лица се спасени, четворица беа пронајдени мртви, а петмина сè уште се водат како исчезнати и се трага по нив“, рече спасувачот М. Ризки.

На местото на несреќата се распоредени повеќе од 300 екипи за пребарување и спасување, кои користат тешка механизација и специјално обучени кучиња за да лоцираат потенцијални преживеани во нестабилните урнатини.

Според властите, меѓу жртвите се двајца возачи на камиони за ѓубре и двајца продавачи на улична храна кои работеле или одморале во близина на локацијата кога се случило уривањето.

Портпаролот на националната агенција за управување со катастрофи предупреди дека прогнозите за нови врнежи од дожд во следните два дена го зголемуваат ризикот од понатамошно движење на остатоци, повикувајќи ги екипите да се придржуваат до строгите безбедносни протоколи.

Трагедијата ја стави во преден план загриженоста за депонијата Бандаргебанг, критична, но преоптоварена локација која го прима поголемиот дел од дневниот отпад од пошироката област на Џакарта.

Објектот со години е во фокусот на предупредувања за прекумерен капацитет. Минатата година, владата објави двегодишен план за забрзување на претворањето на отпадот во енергија, со цел да се намали зависноста од отворени депонии и да се генерира електрична енергија или топлина од отпадот.