Актерот Расел Кроу (56) се надева дека ќе ја репризира својата улога на Максимум во продолжението на филмот „Гладијатор“. Тој ги потсети обожавателите дека неговиот лик е мртов на крајот на блокбастерот од 2000 година, но воедно не ја отстрани можноста дека тој ќе биде дел од претстојното ново остварување.

– Често знам да ја расипам забавата со тоа што ќе ги потсетам луѓето дека мојот лик почина во првиот филм. Но, дали можеме да си играме со тоа? Можеме… – изјави Кроу за „E!News“.

Уште во 2018 година беше известено дека продолжението е во продукција, а колешката на Расел, Кони Нилсен во мај оваа година потврди дека потфатот се уште е на сила, но дека трае поради „пренатрупаниот распоред“ на режисерот Ридли Скот.

Кроу призна дека приказната за продолжението е започната на последниот ден на снимањето на оригиналниот филм од 2000 година.

– Сега постојат толку различни идеи со кои можеме да му пристапиме на продолжението. Да се биде дел од филм кој, и после 20 години од премиерата, некаде се уште е дел од репертоарот на телевизиите и тоа во прајмтајм, тоа е одлично. Додека го создававме, тоа секако не го очекувавме. Всушност, додека го создававме, се беше хаос, се присети актерот.