Општинскиот суд во хрватскиот град Чаковец казнил 23-годишен жител на градот, поради тоа што на 11 септември годинава, во фејсбук-групата „Полициски запирања (Меѓимурје – Чаковец – околина)“ објавил кратка порака: „помеѓу Гардиновац и Декановац, кенгури“. Момчето, секако, мислело на сообраќајните полицајци кои стоеле на локален пат, пишува порталот „Е-Меѓимурје“.

Во таа куса реченица, која обвинетиот пред судот ја опишал како „зезанција“, судијата препознал омаловажување на полицајците кои вршеле сообраќајна контрола на локацијата.

„Тој не ја избришал објавата, ниту, според сопствено признание, размислувал како ќе ја доживеат оние на кои се однесува“, пишува во пресудата, со која момчето е казнето со вкупно 380 евра.

„Обвинетиот сепак изрази каење за стореното и тоа беше земено предвид како олеснителна околност“, вели судијата, кој изрекол казна за делото „навреда на државен орган“ која е пониска од законски пропишаната (700-4.000 евра или 30 дена затвор).