Светската поп-ѕвезда Хари Стајлс отворено проговори за загубата на блиски луѓе во изминатите неколку години, вклучувајќи го и неговиот поранешен колега од бендот „Уан Дајрекшн“, Лијам Пејн. Пејачот накратко проговори за оваа болна тема за време на својот концерт во Амстердам, речиси две години по трагичната смрт на Пејн, пренесува „Мирор“.

За време на четвртата вечер од својата концертна резиденција „Together, Together“ во холандската престолнина, Стајлс накратко го запре шоуто за да поразговара со публиката за „големите животни моменти“ и како тие влијаеле врз него во последно време.

„Ми се случија прекрасни нешта, но поминав и низ некои навистина тешки периоди. Загубив неколку пријатели во изминативе пар години“, им се обрати Хари на фановите, кои веднаш сфатија дека тој мисли на Лијам, кој трагично почина во 2024 година по пад од балкон на хотел во Аргентина.

Хари додаде дека овие пресвртни моменти му помогнале да сфати колку животот може да биде истовремено „тежок“, но и „инспиративен“, принудувајќи го да погледне на сè со поинакви очи.

Покрај обраќањето на концертот, Хари Стајлс неодамна гостуваше и кај познатиот радио-водител Зејн Лоу (Zane Lowe), каде што подетално зборуваше како смртта на неговиот долгогодишен пријател влијаела врз неговото ментално здравје.

„Неверојатно тешко е да изгубиш пријател. Тешко е да изгубиш кој било пријател, но е неподносливо кога ќе изгубиш некој кој ти бил толку сличен во многу нешта“, призна тој.

Пејачот искрено го опиша и притисокот од јавноста и медиумите по трагедијата:

„Мислам дека во периодот веднаш по неговата смрт, навистина се борев со тоа колку е чудно чувството кога другите луѓе се обидуваат да поседуваат дел од твојата сопствена тага. Јас во себе имам толку силни и длабоки чувства за заминувањето на мојот пријател. А во исто време, постојано си свесен дека луѓето околу тебе очекуваат некако јавно да го покажеш тоа за да им докажеш дека навистина патиш. Како да мислат дека ако не го споделиш со нив, тогаш не го ни чувствуваш тоа што го чувствуваш“, заклучи Стајлс.