Жестоки престрелки и размена на оган се забележани во северниот дел на Мексико меѓу безбедносните сили и озлогласениот картел Синалоа, чиј прв човек беше Хоакин Гузман Ел Чапо. Полицијата во рутинска акција пронајде лидери на оваа криминална организација, за потоа дејствијата да ескалираат, објави Би-Би-Си.

Овидио Гузман Лопез, синот на еден од највлијателните криминални босови на денешницата Ел Чапо, бил лоциран за време на рутинска патрола во градот Кулиакан.

Гузман (62) беше прогласен за виновен од судот во Њујорк, САД, за дела кои вклучуваат криумчарење на дрога и перење на пари. Тој успеа да избега од затвор во Мексико преку тунел во 2015 година, но подоцна беше уапсен и екстрадиран во САД во 2017 година. Тој е поранешен прв човек на картелот Синалоа, за кој официјалните лица сметаат дека бил најголем доставувач на дрога во САД.

Државната влада рече дека Овидио Гузман бил пронајден во една куќа во рутинска патрола на полицијата. Се вели дека веднаш потоа, членовите на картелот силно одговориле со вооружен напад и се обиделе да го вратат од властите.

Според пишувањата на Би-Би-Си, за време на престрелката имало и обид за бегство од локалниот затвор, бидејќи тамошните затвореници се обиделе да го искористат хаосот настанат на улиците.