Денеска со почеток од 16.00 часот екипата на ГРК Охрид ќе го игра првиот натпревар од четвртфиналето на ЕХФ Европскиот куп на гости против грчкиот Олимпијакос.

Мечот ќе се игра во Атина, истиот ќе го судат Данците Никлас Нигаард и Јонас Примдал, додека ЕХФ делегат е Андреј Јонут Барбу од Романија.

Македонскиот претставник во саботата го одработи единствениот тренинг во Атина. Владее одлична атмосфера во редовите на Борис Ројевиќ со амбиции да се дојде до поволен резултат пред реваншот закажан за 4 април во Охрид.

Составот на ГРК Охрид за денешниот натпревар: Блажевски, Пилиповиќ, Борозан, Стрмлјан, Ојлески, Јагуриновски, Иванковиќ, Кукуловски, Ристески, Тасески, Реј Моралес, Савревски, Лиапис, Петриќ, Ѓукиќ, Прибетиќ.

-Пред нас е еден тежок натпревар против Олимпијакос. Добро работевме во текот на целата недела и подготвени го очекуваме мечот. Ќе го дадеме максимумот да дојдеме до поволен резултат пред возвратниот дуел на наш терен – изјави играчот на ГРК Охрид, Џанфранко Прибетиќ.