Ракометарите на Охрид го совладаа актуелниот шампион на Македонија Еурофарм Пелистер со 31:26 во финалето на Меѓународниот меморијален турнир „Крсте Андоновски“, што се одигра вечерва во прекрасен амбиент во исполнетата спортска сала „Билјанини извори“.

„Гладијаторите“ имаа водство во најголем дел од натпреварот, а на голот го имаа и одличниот Бојан Блажески кој беше прогласен за играч на финалето.

Блажески се најде и во идеалниот тим на турнирот заедно со уште двајца соиграчи, крилото Ѓукиќ и бекот Иванковиќ кој беше прогласен за најдобар играч на четвртото издание на Меѓународниот турнир „Крсте Андоновски“.

Ова е прв триумф на Охрид на турнирот што го организира заедно со Општина Охрид што, пак, е одлична најава за претстојната ракометна сезона.

Претходно ГРК Охрид на турнирот триумфираше против Киндил од Фарски Острови со 39:25 и Партизан од Србија (30:25), а загуби од хрватскиот Нексе со 30:29.