Гранита е леден десерт што потекнува од Сицилија, каде што традиционално се служи за појадок заедно со посебно бриош-печиво што има карактеристична топка на врвот, пишува „Пун куфер“.

Приготвувањето на гранита е мошне едноставно, а оваа варијанта од лубеница не е исклучок. Сè што ви треба е да го изблендирате овошјето, по потреба со малку лимон и мед, да ја префрлите смесата во ниска сад или тавче и да ја ставите во замрзнувач, кој ќе ја заврши преостанатата работа. Вие само треба да ја промешате неколку пати со виљушка.

Гранитата лесно може да стане коктел – само додајте ликер или жесток пијалак во веќе изладената смеса. На еден литар гранита додадете 2 децилитри ликер по избор или две лажици жесток алкохол.

Потребни состојки:

• 1 кг лубеница, без семки, исечена на коцки
• 2 лажици сок од лимон
• 120 мл мед

Подготовка:

Измешајте ја лубеницата со сокот од лимон и медот и изблендирајте додека да добиете мазна смеса без парчиња. Истурете ја смесата во широка плитка тава или сад и ставете ја во замрзнувач. По еден час, промешајте ја гранитата со виљушка и вратете ја назад во замрзнувачот.

Повторете ја постапката уште двапати, на секој час. Ако правите верзија со алкохол, додадете го пијалакот при последното мешање.

По четири часа, гранитата ќе биде подготвена за сервирање. Пред сервирање, промешајте ја уште еднаш со виљушка.

На здравје!