Заклучно со септември, вкупните депозити што ги имаат граѓаните и фирмите во банките се 10,2 милијарди евра, а истовремено, пласираните пари во кредити изнесуваат 8,7 милијарди евра, покажува извештајот на Народната банка.

Оттаму информираат дека вкупните депозити, на годишно ниво, бележат раст од 13,2 проценти и тоа се должи на растот на депозитите на двата сектора, но поизразен е растот кај секторот „домаќинства“. Корпоративниот сектор пак, на месечно ниво има пад на депозитите од 2 проценти, додека домаќинствата имаат раст од 1,2 проценти.

Вкупните кредити, пак, имаат годишен раст од 13,5 проценти и во поголем дел произлегува од зголемените кредити на корпоративниот сектор, при раст и на кредитирањето на секторот „домаќинства“, кредитите на домаќинствата бележат месечен раст од 1 процент и годишен од 10,8 отсто, со поизразен раст кај кредитите во денари.

Во кредитирањето на домаќинствата над 2,2 милијарди евра се врзани во потрошувачки кредити. Веднаш зад нив се станбените кредити и по тој основ граѓаните должат 1,7 милијарди евра. За автомобилски кредити наменети се 6,9 милиони евра.