„Доброволно или насила, узурпаторите ќе мораат да ја напуштат Куклица. Судот донесе времена мерка со која Стојна Димитровска Бут и нејзиниот татко Милош Димитровски ќе мораат да се оддалечат од локалитетот Камени Кукли и да го предадат во владение на надлежните институции. Ако одбијат, полицијата насилно ќе ги исфрли од кругот на објектот“, вели за телевизијата „24“ градоначалникот на Кратово Тодорче Николовски, откако се обелодени случајот со таткото и ќерката, за кои посетители велат дека своеволно наплаќаат влез кај Камените Кукли, кои се јавно добро и се наоѓаат на јавен простор.

Како што објави „Слободен печат“, жител на Кратово, но и други посетители на споменикот на природата јавно се пожалија дека жената и нејзиниот татко им барале пари за посета на Куклица, а доколку одбијат, станувале агресивни, фрлале со камења и пуштале кучиња на посетителите.

Откако општината вчера се правдаше дека и самата не може да обезбеди пристап до локалитетот, градоначалникот Николовски сега вели дека по повеќегодишни судски постапки и кривични пријави, за првпат има конкретна судска одлука која треба да му стави крај на спорот.

Од МВР велат дека против Стојна Димитровска, нејзиниот татко Милош и нивното здружение е поднесен обвинителен акт за узурпација на недвижности, а против Стојна има и казнен налог поради закани кон туристи.

Насилниците што наплаќаат кај „Куклица“ воделе проекти со ЕУ и со Министерството за животна средина — ќерката била кандидатка на Бачев