Американската тенисерка Коко Гоф се пласираше во полуфиналето на Мастерс турнирот во Мајами, САД, по победата од 2:1 во сетови над Швајцарката Белинда Бенчиќ со 6-3, 1-6, 6-3.

Гоф имаше водство од 3-0 во првиот сет и три брејк-топки, кои Бенчиќ ги спаси, а потоа ги врати.

Сепак, Американката веднаш повторно направи брејк на сервисот на противничката, а подоцна рутински поведе во сетови.

Швајцарката возврати во вториот сет и со два брејка многу убедливо стигна до израмнување на резултатот.

Во петтиот гем од решавачкиот трет сет, Бенчиќ прва направи брејк и поведе, но потоа ѝ дозволи на противничката двапати по ред да дојде до брејк на нејзин сервис и да направи пресврт за победа.

Гоф во полуфиналето ќе игра против Каролина Мухова од Чешка, која ја елиминираше Викторија Мбоко од Канада со 7-5 и 7-6 (5).

Втората полуфинална двојка ќе се дознае по одигрувањето на останатите четвртфинални мечеви: Е. Рибакина – Џ. Пегула и А. Сабаленка – Х. Баптист.