Жестока расправија помеѓу раководителката на секторот  за урбанизам во Општина Гази Баба, Благица Блажевска  и граѓаните го оневозможи почетокот на расправата за донесување  на  трите детални урбанистички планови,  (ДУП за С 17, блок 2, блок 3 и блок 4) за коплексот фабрика Железара.

Таа на присутните  кои побараа одложување на расправата поради несоодветните услови за одржување на дистанца им сеобрати со  зборовите: Ако не сакате да седите, одете си! По ова и самата ја напушти просторијата, но караницата  продолжи  и надвор од  салата на советот.

Одговорната за  урбанизам во Гази Баба тврди дека донесувањето на ДУП-от нема ништо  да  промени, бидејќи како што вели самата,  таму  веќе е предвидена градба,  и без да се донесе ДУП,  секако  ќе се гради, но не тешка загадувачка индустрија.

-Ние направивме пренамена на просторот во лесна незагадувачка индустрија,  намена Г-2. Оние субјекти кои се со  намена Г-1, си останаа со  намена за тешка загадувачка индустрија ама  немаат развој, не можат да доградуваат,  или надградуваат капацитети. Се друго е  со намена  за  деловен простор, зеленило  и лесна индустрија. Во урбанизмот има термин  што се вика „постоечка намена„ а тоа значи дека само им се потврдува намената на  објектите и индустријата што веќе постои. Досега за тој дел од Општината нема донесено Детален урбанистички план, сега дојде време да го урбанизираме и да го средиме, бидејќи има многу субјекти и секој треба да си  добие своја парцела. Донесувањето на ДУП-овие е во знакот на развојот на општината и ако сакате да имате развој на општината, мора да работите,  вели Блажевска.

Земјиштето на кое  ќе се гради е во сопственост на Република Македонија.

Имено, согласно ГУП на Град Скопје основната намена е Г-производство, тешка и лесна индустрија.

Постапката за донесување на ДУП-от е прекината се до следната јавна расправа.