Јованка Јанкоска Бобе, која стои зад блогот bobesbakery.mk, фејсбук и инстаграм-профилот, е вистински кулинарски креативец – нејзините рецепти се милина и за очите и за непцето.

Бобе денеска споделува рецепт за вистински гурмански деликатес: сарми во лозов лист.

– Со доаѓањето на пролетта, природата се буди, а трпезата се збогатува со свежи и ароматични состојки. Еден од најомилените сезонски специјалитети е сармата во лозов лист – лесна, миризлива и исполнета со традиционален вкус што потсетува на домашна топлина и семејни собири. Сармата е препознатливо јадење во македонската кујна. Додека во зима најчесто се подготвува со кисела зелка, напролет добива поинаква освежувачка нота, благодарение на младите лозови листови, кои ѝ даваат карактеристичен и деликатен вкус – порачува Бобе.

Состојки:

– 40-60 млади лозови листови (во зависност од големината)
– 300 грама мелено месо
– 100 грама ориз
– 1 главица кромид
– 1 морков
– магдонос, нане, оригано
– црн бибер, црвен пипер и сол по вкус
– масло за готвење

За прелив:

– малку бело вино (по желба)
– 0,5 кисело млеко
– 3 јајца

Подготовка:

1. Лозовите листови измијте ги и кратко бланширајте ги во врела посолена вода (околу 2-3 минути), потоа извадете ги и оставете ги да се изладат.
2. Во тава загрејте малку масло и пропржете го ситно сечканиот морков, па додајте го кромидот и динстајте додека омекне.
3. Додајте го меленото месо и гответе 5-10 минути. Потоа ставете ги оризот и зачините, измешајте убаво и тргнете ги од оган.
4. На секој лозов лист ставете малку од филот и внимателно завиткајте сарми.
5. Наредете ги сармите во тенџере, прелијте ги со топла вода колку да се покријат и поклопете.
6. Подгответе го преливот: Изматете ги јајцата, додајте го киселото млеко и зачинете со малку сол и црн бибер.
7. Гответе во загреана рерна на 220 степени околу 30 минути. Потоа тргнете го капакот, прелијте со малку бело вино, па со преливот и оставете да се потпечат уште 15 минути.