Гастрономско уживање од вештите раце на Бобе Јанкоска: Марленки
Јованка Јанкоска Бобе, која стои зад блогот bobesbakery.mk, фејсбук и инстаграм-профилот, е вистински кулинарски креативец – нејзините рецепти се милина и за очите и за непцето.
Препорачано
Бобе денеска споделува рецепт за вистински сладок деликатес – марленки.
– Бомбици со раскошен вкус на ореви, бисквити и мед, а во срцето – нежно кремасто полнење од бело чоколадо што се топи со секој залак – порачува Бобе.
Состојки:
– 150 г мелени бисквити
– 150 г мелени ореви
– 80 г омекнат путер
– 60 г мед
– 1 лажичка ванила
– 150 г кондензирано млеко
За полнење:
– 100 г бело чоколадо
– 50 г кондензирано млеко
За валкање:
– 50 г мелени ореви
– 50 г мелени бисквити
Подготовка:
Во сад измешајте ги мелените бисквити, оревите, путерот, медот, ванилата и кондензираното млеко додека добиете компактна смеса.
Кондензираното млеко стоплете го и соединете го со белото чоколадо за да добиете кремаст фил.
Од смесата формирајте топчиња, сплескајте ги, во средина ставете мало топче од бело чоколадо. Затворете ги и обликувајте бомбици.
На крај, извалкајте ги во мешавина од мелени ореви и бисквити. Оставете ги кратко во фрижидер за вкусовите совршено да се соединат.
На здравје!
