После потпишувањето на новиот договор со екипата на Гравелин, македонскиот репрезентативец не ги менува навиките, оние стекнати во текот на оваа сезона, за жал некомплетна, а ја предизвика пандемијата на коронавирус.

Во овој момент лигите во Франција, оние најквалитетните, се ставени во состојба на „мирување“, а капитенот на нашиот сениорски национален тим, Војдан Стојановски, одамна е дома во Скопје.

Одлично се снајде во француското првенство, па иако го пропушти стартот на ланската сезона бидејќи подоцна најде нов клуб, тој експресно се наметна како лидер и во По Ортез и во Гравелин.

– Морам да напоменам и тоа дека ми одговара тој стил на игра, со многу трчање и брзи напади. Слична кошарка се игра и во шпанската лига, во која исто така одлично се снајдов. Затоа е Франција идеална дестинација за мене. Со нетрпение очекувам да почнам со подготовки, и да се насочам кон следната сезона – рече Стојановски, кој уште пред неколку месеци, веднаш по појавувањето на коронавирусот, се врати назад во Македонија.

Капитенот на нашиот национален тим не е уверен дека сезоната ќе продолжи според најавеното, во септември.

– Искрено, не верувам дека постои шанса за такво нешто. И логички ако се размислува, како би се доиграла оваа сезона во септември, кога екипите треба да се веќе во наредната? Многу пореално сценарио е да се размислува за наредната. Од она што знам е дека главното прашање е дали следниот шампионат во ЛНБ да брои 18, или па да се прошири на 20. клубови учесници. И по кој систем би се одиграло, останува лигата да го даде конечниот збор. Како и да е, прво сето ова да помине, па после да дојде она најдоброто, да играме кошарка – додаде предводникот на сениорите.