Француската морнарица ги истражува тврдењата дека маскирани маринци кои не биле на должност се „справиле“ со немирите во западниот град Лориен, дом на голема воена база, за време на националните немири минатата недела.

Локалниот весник „Телеграм“ објави слики од групи на таканаречени „анти-бунтовници“ кои носеле маски додека ги фаќале и тепале демонстрантите во градот во петокот вечерта.

Весникот „Уест Франс“ објави интервју со 25-годишен маж кој рече дека е припадник на вооружените сили и интервенирал за да ја поддржи полицијата заедно со околу 30 колеги за „да не ја остави земјата да гори“.

Морнаричката единица Форфуско со седиште во Лориен „отвори истрага која е во тек. Сè додека не се знаат резултатите, нема да има дополнителни коментари“, се вели во соопштението на Министерството за одбрана за новинската агенција „АФП“.

Градоначалникот на Лориен, Фабрис Лохер, изјави за „АФП“ дека не може да потврди што се случило, но рече дека „видел луѓе со маски. Мислевме дека се бунтовници“.

„Она што е важно за мене е што вели Форфуско“, рече градоначалникот, додавајќи дека е загрижен за влијанието на инцидентот врз угледот на неговиот град.

Неименуван полицаец, цитиран од „Телеграм“, рече дека полицајците првично им дозволиле на „анти-бунтовниците“ да интервенираат „бидејќи тоа ни помагаше“ пред да сфатат дека тие „претерале“.

Весникот цитираше сведок кој вели дека мажите се опишале себеси како „патриоти“.