Додека Град Скопје и Општина Центар си ја префрлуваат топката за тоа чија е одговорноста да се санира потпорниот ѕид во близина на Детската Клиника, состојбата на терен се влошува.

Ѕидот уште повеќе е одронет, во близина се излева вода од карпата, а одронетите делови веќе се на коловозот. Накосеноста на ѕидот е евидентна исто како и негрижата на властите за овој проблем.

Уште во мај 2019 година Детската Клиника испрати апел Општина Центар да го санира потпорниот ѕид на улицата Белградска бидејќи е навален, ама одговорот бил дека надлежноста е на Град Скопје. Од Град Скопје пак топката ја префрлија на Министерството за здравство, дека тоа било одговорно да го решава проблемот. Министерството пак вели дека нема надлежност над тоа земјиште. На терен нема екипи да работат и да го решат проблемот на граѓаните. На крајот – ризикот од ваквиот меѓуинституционален пинг-понг, секако е на пациентите и нивните семејства кои во автомобили се движат по оваа улица. „Слободен печат“ беше на терен и ситуацијата ви ја доловуваме во продолжение преку видео материјалите и фотографиите на нашиот фоторепортер Методи Здравев.