Стивен Спилберг го нарече „Кум“ (The Godfather) „најдобриот американски филм на сите времиња“, Роберт Де Ниро се пошегува дека му било жал што бил избран за продолжението, а не за оригиналот, а Харисон Форд едвај ги задржа солзите размислувајќи за својата улога во филмот „Разговорот“ (The Conversation) од 1974 година, пишува „Асошиејтед прес“.

Во центарот на сè беше Френсис Форд Копола, кој во саботата ја доби наградата за животно дело од Американскиот филмски институт на церемонија во театарот Долби, каде се собраа легендарни филмски ѕвезди.

„Кога бев дете, постоеа само Оскарите. Сега имаат наградна емисија за најдобрата наградна емисија. Но ова е малку поинаку, затоа што е лично признание од луѓе кои ги познаваш цел живот, колеги, пријатели, па изгледа како да се враќаш дома“, изјави 86-годишниот Копола на црвениот тепих пред настанот.

„Вие, господине, немате ранг. Го земавте она што постоело пред вас и го променивте канонот на американскиот филм“, рече Спилберг.

Копола седеше помеѓу Спилберг и Џорџ Лукас, додека актери и режисери како Спајк Ли, Дастин Хофман, Ал Пачино и Морган Фримен се редеа со пофалби за оскаровецот.

„Сонувач на соништа со минимален буџет, раскажувач на приказни што чинеле и изгубиле милиони. Но, вечерва банките нека одат по ѓаволите“, рече Фримен низ смеа и аплаузи.

Лукас, долгогодишен пријател и колега на Копола, му ја врачи наградата. Тие се познаваат со децении и заедно ја основале продукциската куќа American Zoetrope во 1969 година.

„Собра група млади студенти по филм, се преселивме во Сан Франциско, надевајќи се дека ќе го надмудриме системот. И успеавме. Како режисерите од почетокот на оваа уметност, немавме правила. Ние ги напишавме, а ти ја држеше пенкалото“, рече Лукас.

Копола беше прилично воздржан во текот на церемонијата додека Холивуд му одаваше почести, сè додека не ја прими наградата на крајот на вечерта. Се насмеа широко додека се приближуваше кон сцената и им се заблагодари на присутните, меѓу кои беа и членови на неговото семејство и ѕвезди од повеќе генерации.

„Сега разбирам дека ова место што ме создаде, мојот дом, всушност не е место – туку вие. Пријатели, колеги, учители, другарчиња, семејство, соседи – сите убави лица што ме пречекуваат назад. Јас сум и секогаш ќе бидам ништо повеќе од еден од вас“, рече тој.

Копола е 50-иот добитник на оваа награда, која првпат му беше доделена на Џон Форд во 1973 година. Минатогодишната добитничка на наградата беше Никол Кидман, а други неодамнешни добитници се Џон Вилијамс, Мел Брукс, Дензел Вашингтон и Џули Ендрјуз.