Комичарот Мел Брукс, актерката Анџела Басет и монтажерката Керол Литлтон добија почесни Оскари на 14. издание на Гувернеровите награди, во организација на Академијата за филмски уметности и науки.

На свеченоста во Лос Анџелес присуствуваа бројни ѕвезди, меѓу кои Мартин Скорсезе, Кристофер Нолан, Пенелопе Круз, Натали Портман, Леонардо Дикаприо и Бредли Купер, јавуваат американските медиуми.

Годинашната хуманитарна награда „Џин Хершолт“ отиде во рацете на Мишел Сатер, влијателната основачка и долгогодишна директорка на уметничките програми на Институтот Санденс.

Гувернеровите награди ги организира Одборот на директори на Академијата за филмски уметности и науки, со цел да се оддаде признание за придонесот во филмската индустрија и животните достигнувања.

Настанот порано беше дел од програмата на Оскарите, но беше исклучен во 2009 година и оттогаш говорите на церемонијата не се временски ограничени.