ФОТО | Бриош пржени стапчиња: вкус на крофни за само 7 минути!

Бриош стапчиња/приватна архива
Бриош стапчиња/приватна архива

Сигурно кога имате вишок леб, си правите пржени лепчиња. Овој пат, се инспирирав од бриош лебот со краен рок до утре, кој ми останал во кујна и направив сладок појадок. Едно од имињата на францускиот тост е poor knights, или „сиромашните витези“, реферирајќи на едноставноста на рецептот, но и декаденцијата на сладок леб кој се пржи со јајца и шеќер.

Убавината на овие пржени стапчиња е во едноставноста. Се прават буквално за 7 минути!

Потребно ви е:

  •  6 кришки стар бриош леб
  • 2 јајца
  • 1 лажица шеќер
  • 100 мл млеко
  • неколку капки ванилин екстракт
  • малку цимет
  • малку морско оревче

Подготовка:

Во длабок сад, изматете ги јајцата и додајте млеко, шеќер, зачините и ванилин екстракт. Добро матете за да се стопи шеќерот. Бриош лебот исечете го на долги стапчиња и секое убаво извалкајте го во смесата од јајца и шеќер. Пржете на среден оган за да не ви изгорат. Додека се топли, посипете ги со шеќер во прав. Вкусот неодоливо потсетува на крофни, а се прават наједноставно на свет.
Служете ги со омиленото овошје и шолја чај или кафе.

Уживајте!

Бриош стапчиња/приватна архива

Видео на денот