Најмалку 18 работници во рудник за злато во северозападна Колумбија се заробени во рудникот откако во него се случила „сериозна несреќа“.

Како што денес објави владата, несреќата се случила во Ремедиос, во департманот Антиокија во Колумбија, и „се чини“ дека станува збор за „нелегален“ ископ на руда.

„Активирани се сите протоколи за итни случаи“ за спасување на рударите за злато, истакна вчера, четврток, министерот за рудници и енергетика Едвин Палма во објава на социјалната мрежа Икс.

„Претпоставуваме“ дека тие сè уште се живи, соопшти неговото министерство, без да ги прецизира причините за несреќата.

Јарле Еразмо Марин, портпарол на локалниот синдикат на рудари, за АФП изјави дека по „механички дефект“, се урнала структура наменета за спречување на лизгање на земјиштето, „блокирајќи“ го главниот излез на рудникот.

Фотографиите објавени од Националната служба за рудници покажуваат спасувачи со факели како вршат пребарување.

Expresamos nuestra solidaridad con las familias de los afectados por un derrumbe en bocamina en Remedios, Antioquia.

Nuestro equipo de Seguridad y Salvamento Minero atiende desde el primer momento las labores de rescate https://t.co/bKM6VbJ3pF pic.twitter.com/daZ7ALKC6D

— AgenciaNaldeMinería (@ANMColombia) July 18, 2025

Департманот Антиокија во Колумбија има долга традиција во рударството. Златото ископано таму понекогаш служи како извор на финансирање за вооружени групи како што е Клан дел Голфо, голем картел во земјата, кој е исто така вклучен во трговија со кокаин.

Несреќите поврзани со рударството на јаглен се почести во Колумбија, особено во централниот дел од земјата, и одземаат десетици животи секоја година.