На само неколку чекори од главниот плоштад во Венеција, на магливиот раб на Големиот канал, се наоѓа еден од најлуксузните хотели во градот – „Аман“, пишува „Дејли мејл“.

Со барокните фрески на прочуениот сликар Џамбатиста Тјеполо, ресторан што служи полнети касончели со јастог и приватен влез кој ги штити гостите од љубопитните погледи, не е ни чудо што оваа палата од 16. век е омилено прибежиште на најбогатите гости на Венеција. Токму затоа, овој хотел е совршен избор за дел од гостите на свадбата на четвртиот најбогат човек во светот, Џеф Безос, и неговата избраничка, поранешната новинарка Лорен Санчез.

Единаесет години по свадбата на Џорџ Клуни и Амал во истиот хотел, ѕвездите повторно се собираат во „Аман“ за уште една „свадба на годината“.

Околу 200 славни гости се очекуваат во Италија за свадбата на Безос оваа недела, меѓу нив членови од семејството Кардашијан, Опра Винфри, Бил Гејтс и Иванка Трамп. Среќните 48 гости ќе бидат сместени во 24-те соби на хотелот, кои Безос ги резервирал за три ноќи почнувајќи од среда. Ноќевање во најлуксузните апартмани може да достигне и до 10.000 фунти.

„Тоа е единственото место во градот што одговара на вкусот на некои од овие гости. Ќе добијат сè што ќе посакаат. Обично хотелот може да се изнајми најмногу за две ноќи, но со доволно пари – сè е можно,“ вели извор близок до организацијата.

Иако самата свадба ќе се одржи на островот Сан Ѓорџо Маџоре, парот ќе организира и приеми во „Аман“. Една од вечерите ќе вклучи настап на добитничката на Греми, Лејди Гага, на истото пијано што некогаш го свирел композиторот Шопен.

Гостите ќе можат да уживаат во специјалитети подготвени од домашни готвачи и слаткати, прошетки по пазари со лични готвачи, како и избрани вина – вклучително и омиленото вино на Безос, „Дуга-Пи Гранд Кру“, кое еднаш го платил 3.000 фунти во Кан.

Хотелот има библиотека со поглед на каналот, покривна тераса и една од ретките приватни градини во градот. За оние што сакаат релаксација, тука се и термални третмани за подмладување, како и козметичка линија на самиот хотел.

„На некои свадби тука има жива музика со оперски квартети. Една од салите дури била претворена и во ноќен клуб“, додава изворот.

Хотелот е сместен во палатата Пападополи, изградена пред 450 години, која 200 години била дом на истоименото благородничко семејство. И денес, потомците на семејството живеат на најгорниот кат, но оваа недела заминале на одмор, оставајќи го пентхаусот на располагање за младенците – или некој друг исклучителен гостин.

Откако хотелот беше отворен во 2013 година, често се нарекува најдобар во Италија. Затоа и не беше изненадување што Џорџ и Амал Клуни, кои се запознаа во Италија и имаат вила на езерото Комо, ја избраа токму оваа локација за својата венчавка во 2014 година. Присуствуваа стотина блиски личности, меѓу кои Ана Винтур, Мет Дејмон и Синди Крафорд. Свадбата ја водеше поранешниот градоначалник на Рим, Валтер Велтрони.

Лорен Санчез во мај ја прослави моминската вечер во Париз со ѕвезди како Ким Кардашијан, Крис Џенер и Ева Лонгорија, кои се очекува да бидат и на свадбата. Сѐ уште не е познато дали ќе дојдат и Кети Пери и Орландо Блум, кои биле со неа на патувањето во вселената во април, но наводно се во затегнати односи.

Свадбата, за која се претпоставува дека ќе чини до 10 милиони фунти, предизвика негодување кај локалното население. Неколку протести се одржаа со транспаренти „Нема простор за Безос“.