Во одамна напуштен рудник направен е подземен хотел наречен „Deep sleep“(„Длабок сон“), за кој се тврди дека е најдлабоката точка за ноќевање на светот, пишува „Би-би-си“.

Гостите се поканети да престојуваат на 419 метри под земјата, под планините Сноудонија во Велс, во една од четирите приватни кабини со два кревети или посебниот апартман со брачен кревет, трпезарија и едноставен тоалет.

Оваа подземна дупка, во која престојот ќе ве чини околу 550 фунти, е поставена длабоко во напуштениот рудник и може да се пристапи само преку „стрмна и предизвикувачка“ рута. Од компанијата „Гоу билоу“ („Go Below“) велат дека патот не е за оние со слабо срце. За да го искусите ова необично доживување, потребно е да пешачите два часа и потоа да се спуштате со јаже.

Хотелот е отворен само една ноќ неделно – сабота навечер. Искуството на гостите започнува во 17 часот во базата на компанијата „Гоу билоу“ („Go Below“), каде што се среќаваат со водичот што ќе ги води до хотелот.

Водичот ги информира гостите за животните приказни на мажите и момчињата, кои работеле во рудникот, додека се во искчекување да пристигнат во хотелот. Персоналот преноќува во хотелот, заедно со гостите, а ова задоволство завршува следниот ден во осум часот со појадок од „едноставни закуски“ и топол пијалок.