Британскиот крал Чарлс и кралицата Камила својата посета на САД ја продолжија кон Њујорк, каде посетија знаменитости, историската библиотека на Петтата авенија, како и спомен куќата на жртвите од нападот 9/11.

Кралицата Камила во придружба на познатата актерка Сара Џесика Паркер ја посети зградата на Јавната библиотека во Њујорк. Во текот на средбата со личности од светот на литературата и модата, ја погледна изложбата на ретки дела и на библиотеката ѝ врачи изненадувачки подарок за нејзината збирка.

Меѓу гостите беше и поранешната главна уредничка на „Вог“, Ана Винтур, која направи исклучок и ги симна своите препознатливи темни очила за да ја поздрави кралицата. Камила за таа пригода избра темносин свилен фустан и палто од дизајнерката Фиона Клер, кој го украси со брош во боите на британското знаме, на покојната кралица Елизабета Втора.

Во текот на приемот кралицата зборуваше за својата животна љубов кон читањето, која во неа уште во детството ја разбудил нејзиниот татко. Во својот говор кралицата се осврна на библиотеката како на место кое отсекогаш сакала да го посети, па нагласи дека книгите се најдобар пријател и во добрите и во лошите времиња.

Од друга страна, кралот и кралицата се запознаа и со новиот градоначалник на Њујорк, Зохран Мамдани.

Денот во Њујорк го завршија со гала вечера на добротворната организација „Кингс траст“, што ја основаше кралот Чарлс Трети, а која слави 50 години од засилувањето на кариерите на младите луѓе.

На гала вечерата присуствуваа многу познати личност, вклучувајќи го Лајонел Ричи, Иман, Донатела Версаче, Стела Мекарти, Марта Стјуарт, Карли Клос и Јасмин Тукс.

Кралот Чарлс сепак не го откажува своето патување во САД поради пукањето