На Универзитетската клиника за детски болести денеска соработник на тимот за одговор при катастрофи на Црвениот крст на град Скопје, маскиран во Дедо Мраз и волонтери маскирани во костуми на суперхерои од цртаните филмови се спуштија по јаже од хеликоптер и им поделија пакетчиња на децата хоспитализирани на Клиниката.

На овој показна вежба под името „Да подариме насмевка” учествуваше тимот за спасување на планина, како дел од тимот за одговор при катастрофи на Црвениот Крст на град Скопје, а вежбата се организираше во соработка со МВР и Хеликоптерска единица.

Директорот на Клиниката за детски болести, Реџеп Мемеди рече дека ова е традиционална акција на Црвениот крст на град Скопје во која Дедо Мраз и другите јунаци од детските филмови ги израдуваа децата со новогодишни пакетчиња.

Тој се заблагодари на Црвениот крст на град Скопје, чии тимови, како што појасни, носат радост барем во последните денови од годината на децата кои мораат да останат на болничко лекување.

– Околу 100 деца во моментов добиваат болнички третман и најголем број од нив ќе мора и во деновиве пред Новата година да останат во клиниката поради нивната состојба. Со ваквите акции ја ублажуваме нивната болка и им носиме радост за да ги поминат во поубава атмосфера овие денови, додаде д-р Мемеди.

Арѓенд Чилафи, стручен соработник во тимот за одговор при катастрофи на Црвениот крст на град Скопје, рече дека Црвениот крст традицонално, по осми пат, под мотото „Да подариме насмевка“ и годинава е присутен на Детската клиника, дел од нив облечени во костуми, „колку толку да украдат некоја детска насмевка“.

– Нема нешто поубаво кога ќе ги видите лицата на децата кои овие предновогодишни денови ќе ги поминат во болничка постела. Им посакувам што побрзо да го напуштат овој објект. Успеавме Дедо Мраз и дел од волонтерите облечени во костуми да ги донесеме со хеликоптер. Нешто ново, нешто различно од изминатите седум години. Се надевам, доколку успее ова да остане традиција, наредната година да смислиме нешто поубаво со цел да израдуваме некое дете, рече Чилафи.