Порталот „Инфомакс“ објави фотографија од охридски ресторан, на која се гледа поранешниот претседател на државата, премиер и лидер на Социјалдемократскиот сојуз на Македонија, Бранко Црвенковски, во друштво на двајца актуелни функционери на ВМРО-ДПМНЕ.

На фотографијата, за која се тврди дека е направена попладнево, на маса со Црвенковски, познат под прекарот „папата“, на само пет дена до локалните избори, е актуелниот градоначалник од владејачката партија и кандидат за нов мандат во Охрид, Кирил Пецаков, како и пратеникот од ВМРО-ДПМНЕ од градот, Сашо Донев.

Црвенковски долго време не е активен на политичката сцена и тој ретко се појавува во јавноста. Последен пат беше актуелен пред изборите лани, кога неговото име се поврзуваше со формирањето на движењето ЗНАМ – За наша Македонија и Максим Димитриевски.