Британска фарма, сместена на островот Хејлинг, ги замолува посетителите да престанат да се фотографираат голи на нивното поле со сончогледи, пишува „Си-ен-ен“.

Сопствениците на фармата „Стоук Фрут“, која се наоѓа во близина на јужниот брег на Англија, на социјалните мрежи објавија необично барање, откако забележале дека сѐ поголем број посетители  се соблекуваат голи, за да се фотографираат меѓу сончогледите.

 „Потсетување до сите. Ние сме семејна фарма и ве молиме бидете облечени во полето! Имаме зголемен број на пријави за фотографирање на голи луѓе и тоа не смее да се случува за време на нашите јавни настани, ве молиме!“, напишале сопствениците.

Сем Вилсон и неговата сестра Нет Петли, ја водат фармата што им ја оставил нивниот дедо. Распространета е на  350 хектари, каде произведуваат пченица, грашок, компири, тикви, слатка пченка, сено и сончоглед.

Вилсон изјавил дека досега имало околу шест инциденти, на луѓе, кои се соблекле меѓу сончогледите за да се фотографираат, откако полето го отвориле за посетители на крајот на минатиот месец.

„Отсекогаш сме имале луѓе кои се фотографирале на ризични начини, но ова е прва година кога имаме проблем, поради што почнавме да ставаме знаци“, рекол тој.

Тој рекол дека со неговиот тим одлучиле да стават знаци низ фармата, откако неколку деца биле сведоци што се случува.

Инаку, сончогледите ги засадил Вилсон со неговата тогашна свршеница зад црквата во која се венчале пред шест години. Но, растенијата не процветале навреме за нивната свадба.

Денес, посетителите се поканети да шетаат низ огромната површина од околу 50 хектари, која е покриена со два милиони сончогледи.