Програмата „Вело училиште“ на еколошката организација „Еко логик“, која долги години се заложува велосипедизмот да се изучува во формалното и неформалното образование, деновиве организираше нови работилници за учениците – како безбедно да возат, контролираат, но и како да доаѓаат со точак до училиште.

„Преку ‘Основи на безбедно возење на велосипед’ учениците научија како да го подготват велосипедот пред возење — проверка на кочници, гуми и правилно прилагодување. Преку практични вежби вежбаа старт, одржување рамнотежа и контролирано запирање, развивајќи сигурност и координација“, соопштија од „Вело училишта“.

Според организацијата, се разговарало и за безбедно однесување околу училиштето и одговорно движење во училишна средина.

Претходно, се работело и на темата „Основни делови на велосипедот, видови на велосипеди и употреба на велосипедот како превозно средство во секојдневниот живот“.

Учениците се запознале со основните делови на велосипедот, какви разни точаци постојат, но и нивната намена во однос на теренот и условите за движење.

„Преку дискусија се отвори прашањето колку велосипедот се употребува во секојдневието и дали може почесто да се користи за да се дојде до училиште. Учениците размислуваа што им е потребно да се чувствуваат безбедно – помал сообраќај околу училиштето, повеќе простор за движење и подобра организација при пристигнување и заминување“, информираа од „Вело училишта“.

Обуки периодов се одржуваат и за настаниците по физичко образование меѓу 1-5 одделение. Активистите од „Вело училишта“ им ги претставиле моделите „Педибус“ и „Бицибус“ како едноставни, но моќни решенија за побезбедно движење на основците околу училиштата.

„Зад овие активности не стои само грижа за безбедноста, туку и јасна визија за градење здрави навики и одговорно однесување уште од најмала возраст. Активностите се отворени и инклузивни – ги охрабруваат и девојчињата и момчињата, како и децата со попреченост, да бидат дел од заедницата и да се чувствуваат безбедно и прифатено. На овој начин, ‘Вело училишта не само што промовира активна мобилност, туку и ги поставува темелите на инклузија и одговорност“, соопштија од организацијата.

Како што велат, доброто управување започнува уште од најрана возраст – со мали чекори што создаваат големи промени.