Европската комисија денес претстави Акциски план за електрификација и предложи реформи на Системот за тргување со емисии (ЕТС) на Европската Унија, со цел да се зајакне конкурентноста на блокот, да се намали зависноста од увоз на фосилни горива и да се забрза декарбонизацијата на индустријата.

„Денес предлагаме Европа да стане првиот континент во светот што се напојува со електрична енергија“, изјави претседателката на Европската комисија, Урсула фон дер Лајен.

Предлозите имаат за цел да ја зголемат електрификацијата во индустријата, транспортот и зградите, истовремено модернизирајќи го пазарот на јаглерод за да се поттикнат инвестициите и да се обезбеди поголема поддршка за европските производители кои се соочуваат со растечки економски и геополитички притисоци.

Комисијата вели дека удвојувањето на уделот на електричната енергија во вкупната потрошувачка би ја намалило сметката за увоз на фосилни горива во ЕУ за 260 милијарди евра годишно до 2040 година.

Комисијата истакнува дека возењето електрично возило на батерии може да заштеди до 78 отсто во споредба со еквивалентен автомобил на фосилни горива. Преминувањето од гасни котли на топлински пумпи би ги намалило просечните трошоци за греење на домаќинствата во ЕУ за до 60 проценти.

Земјите членки ќе бидат обврзани да реинвестираат 50 отсто од националните приходи од ETС во секторите што се опфатени со пазарот на јаглерод.

Според новиот предлог, задржувањето на бесплатните дозволи за емисии по 2030 година директно ќе зависи од степенот на инвестиции во процеси за декарбонизација.

„Најдобриот начин да се намали зависноста на Европа од фосилната енергија е да ја напојуваме нашата економија со електрична енергија од чисти, домашни извори“, посочи Урсула фон дер Лајен.

Европа гори, сметките растат, а клима-уредите трошат рекордни количини енергија