Бугарија официјално ќе го воведе еврото на 1 јануари 2026 година, но граѓаните се поделени околу тоа дали тоа е добро за нив или не. Репортерите на Politico разговараа со бугарските граѓани за нивните стравови и надежи додека се збогуваат со националната валута, левот. Антон Теофилов, 73, продавач од Перник, вели дека го поддржува овој потег бидејќи ги олеснува плаќањата и патувањето во рамките на ЕУ.

– Заедничката валута е добра за економијата и за луѓето. Нема повеќе менување пари кога одите во Грција или каде било на друго место. Сè што е потребно е подобра едукација на луѓето и политичарите за промените – вели Антон.

Петја Спасова, 55, ортопед од Софија, од друга страна, изразува загриженост.

– Загрижена сум за моментот кога ќе влеземе во Еврозоната. Политиката и економијата се нестабилни, а ќе ги делиме долговите на целиот континент. Основните цени веќе растат, а граѓаните со пониски приходи ќе бидат најмногу погодени. Се плашам дека повторно ќе доживееме криза како во деведесеттите – вели Спасова.

Светослав Бонински, 53, возач од Габрово:

– Не сакам Бугарија да го следи патот на Грција или Хрватска, каде што цените и инфлацијата се зголемија. Сè уште функционираме добро со левовите. Владата мора да ја подготви земјата пред да го воведе еврото, а во моментов не е подготвена.

Натали Илиева, 20, студентка од Перник, го гледа овој момент како чекор напред.

– Тоа ќе ни ги олесни патувањата и трговијата. Проблемот може да биде почетниот период на прилагодување, но левотот е веќе врзан за еврото, така што нема да има никакви драматични промени. Државата треба да ги следи цените и да спречува злоупотреби.

Бугарија влегува во Еврозоната со различни чувства и ставови на граѓаните во оваа пригода. Додека некои гледаат можност за економска стабилност и подобра поврзаност со Европа, други се плашат од инфлација, зголемување на трошоците за живот и губење на контролата врз националната економија – пишува Каматица.