Европска агенција за животна средина: С. Македонија и регионот со најштетни последици по здравјето од загадувањето

Фото: EPA-EFE/OLIVIER HOSLET

Последниот извештај на Европската агенција за животна средина (ЕЕА) покажува дека аерозагадувањето и натаму претставува најголема еколошка опасност по здравјето, а Северна Македонија и другите земји од регионот конзистентно покажуваат лоши резултати во анализите за последиците врз здравјето на граѓаните, јави дописничката на МИА од Брисел.

Албанија и Босна и Херцеговина бележат најлоши резултати во делот на смртни случаи поради животната средина и се наоѓаат на дното на скалата од вкупно 37 рангирани земји. Албанија е на последно место со 172 смртни случаја на 100.000 лица додека Северна Македонија е на 29. место со 120 смртни случаи на 100.000 жители. Полошо рангирани од нашата земја се уште Романија, Бугарија, Унгарија, Црна Гора и Летонија. Со рангирањето се опфатени 37 земји од кои 28 се членки на Европската Унија (ЕУ), пет земји од Западен Балкан без Косово за кое агенцијата нема податоци и четири земји од Европската економска област (EEA).

Бројките на ЕЕА покажуваат дека постои драстична разлика на квалитетот на животната средина меѓу Источна и Западна Европа, па така на Исланд, кој е на врвот на скалата, прерани смртни случаи поради состојбата со животна средина изнесуваат 35 на 100.000 жители. Шведска, Норвешка и Швајцарија, исто така, котираат при врвот.

Во извештајот се пресметани сите еколошки фактори: загаденост на воздухот, на почвата и на водата со хемиски и со биолошки агенси, но и звучното загадување и електромагнетните полиња, влошување на еко-системите, ултравиолетови и јонски радијации, ризици поврзани со работното место, земјоделските методи, како и личниот однос кон животната средина и хигиената, како што е миењето раце и прехранбени производи.

Според анализата на Агенцијата, 90 отсто од смртните случаи поврзани за животната средина во Европа се незаразни болести како ракот, кардиоваскуларни болести, ментални и невролошки пореметувања или, пак, астма.

Штетната животна средина во Европа од воздушното и звучно загадување, со климатските промени и употребата на опасни хемикалии придонесуваат, се причина за секој осми смртен случај според Агенцијата.

Во контекст на пандемијата со Ковид-19, преземањето на конкретни чекори станува приоритет за ЕУ, со оглед дека огромен дел од опасноста врз животната средина доаѓа од човечката активност.

– Ковид-19 е уште еден потсетник кој силно нѐ освестува за односот меѓу нашите еко-системи и нашето здравје и потребата да се соочиме со фактите. Начинот на кој живееме, конзумираме и произведуваме е штетен за климата и негативно се одразува врз нашето здравје, изјави еврокомесарката за здравство, Стела Кириакидес, по објавувањето на извештајот.

Еврокомесарот за животна средина, Вирхиниус Синкевичиус, се осврна и на штетните последици врз најранливите групи во населението.

– Секој мора да разбере дека со грижа за нашата планета, не само што ги спасуваме нашите еко-системи, туку и живот, посебно оние на најранливите, рече комесарот, со оглед дека овие лица се и најпогодени.

Аерозагадувањето е најголемата закана по здравјето на Европејците, со 400.000 случаи на предвремена смрт, а на второ место е звучното загадување. Јасно е дека источна Европа е посебно погодена од загадувањето, а Босна и Херцеговина има највисока стапка на смрт поради загадување – 27 отсто, наспроти деветте отсто на Исланд и во Норвешка.

Најсиромашните слоеви на населението се најпогодени и носат троен товар – сиромаштија, лоша животна околина и слабо здравје.

Извештајот препорачува поинтегриран пристап меѓу политиките за животна средина и здравствените политики, со посебна заштита на најранливите групи и размножување на зелени решенија посебно во урбаните средини: повеќе паркови, места за релаксација, за физичка активност и социјална интеграција. 

Почитуван читателу,

Нашиот пристап до веб содржините е бесплатен, затоа што веруваме во еднаквост при информирањето, без оглед дали некој може да плати или не. Затоа, за да продолжиме со нашата работа, бараме поддршка од нашата заедница на читатели со финансиско поддржување на Слободен печат. Станете член на Слободен печат за да ги помогнете капацитетите кои ќе ни овозможат долгорочна и квалитетна испорака на информации и ЗАЕДНО да обезбедиме слободен и независен глас кој ќе биде СЕКОГАШ НА СТРАНАТА НА НАРОДОТ.

ПОДДРЖЕТЕ ГО СЛОБОДЕН ПЕЧАТ.
СО ПОЧЕТНА СУМА ОД 60 ДЕНАРИ

Видео на денот