Поранешните директори на Клиниката за онкологија Нино Васев и Нехат Нухи, за да се бранат од слобода и да им биде укината мерката притвор, и двајцата понудиле хипотека на недвижен имот чија заедничка вредност надминува 500 илјади евра.

Кривичниот совет при Основниот кривичен суд Скопје, постапувајќи по предлог на одбраната Никола Васев и Нехат Нухи за укинување на мерката притвор со определување гаранција, го уважи предлогот, а позитивно мислење дало и Јавното обвинителство.

На обвинетиот Нино Васев му е определена гаранција во износ од 183.981 евра во корист на Македонија која се состои од ставање под хипотека на недвижен имот, додека на обвинетиот Нехат Нухи му е определена гаранција во износ од 348.049 евра, исто така со ставање под хипотека на недвижен имот. На обвинетите им се определени мерки на претпазливост – забрана за напуштање на живеалиштето во Скопје, обврска еднаш месечно да се јавуваат во судот и привремено одземање на патните исправи и забрана за издавање нова патна или друга исправа за преминување на државната граница.

При одлучувањето, покрај позитивното мислење на Јавното обвинителство, Советот го имал предвид и фактот дека мерката притвор, определена со решение на Апелациониот суд Скопје, согласно законските одредби, може да биде продолжувана и да трае најдоцна до 18 јули 2026 година.

Со оглед дека надлежното обвинителство се откажа од правото на жалба против овие решенија, а хипотеката понудена како гаранција е веќе впишана во Катастарот на недвижности, истите станаа правосилни, по што обвинетите се ослободени од притвор, информираше Кривичниот суд Скопје.

Судење Онкологија: „Фезго“ не се дава кај рак на дебело црево, ниту „херцептин“ кај хер негативен рак на дојка тврдат двајца онколози во судница