Израелската армија денеска го нападна јужен Либан, при што загинаа 15 лица, објави државната новинска агенција ННА, а Израел тврди дека нападите започнати во текот на ноќта биле насочени кон цели на Хезболах во неколку области, пренесува Ројтерс.

Жителите и локалните медиуми изјавија дека израелските воздушни напади и гранатирање погодиле неколку градови во округот Набатие во текот на ноќта и рано утрово, во бомбардирање за кое ННА рече дека е меѓу најтешките во последните неколку недели.

Израелската војска соопшти дека нападнала, како што ги опиша, милитанти на Хезболах и инфраструктура на неколку јужни локации како одговор на повторените прекршувања на прекинот на огнот од страна на групата поддржана од Иран.

Ескалацијата доаѓа еден ден откако Израел објави мапа на која се гледа проширена зона на воена контрола во јужен Либан, над која соопшти дека нема да исклучи напади, доведувајќи го во прашање привремениот мировен договор со Иран, постигнат со посредство на САД, потпишан во средата.

Договорот повикува на прекин на борбите на сите фронтови, вклучително и на Либан, и на почитување на територијалниот интегритет и суверенитет на Либан. Висок израелски функционер изјави дека Израел е во „тврдоглави преговори“ со администрацијата на американскиот претседател Доналд Трамп за задржување на трупите распоредени 10 км во јужен Либан, додека продолжуваат операциите против Хезболах.

Израел ги отфрли повиците за повлекување на своите сили од јужен Либан, каде што Хезболах продолжи да напаѓа израелски позиции, некои користејќи беспилотни летала полни со експлозив, кои убија и ранија војници оваа недела, пишува Ројтерс.