Наставник од градот Блекпул во Велика Британија, е осуден на доживотен затвор за убиството на својот посвоен син, 13-месечниот Престон Дејви, пренесe „Скај њуз“.

Покрај за убиство, Џејми Варли на судскиот процес беше прогласен за виновен и за сексуално злоставување на дете, вклучително и по 13 обвиненија за правење и поседување непристојни фотографии и видеа.

На истото судење, неговиот партнер Џон Мекгован-Фазакерли беше осуден на 25 години затвор за сексуален напад, суровост кон дете и предизвикување смрт на дете.

Како што објави „Скај њуз“, Варли првично се обидел да се одбрани пред полициските службеници тврдејќи дека момчето случајно се удавило во када во јули 2023 година.

Сепак, извршената обдукција и медицинските докази целосно ја отфрлија неговата верзија на настаните, утврдувајќи дека детето било целосно суво по пристигнувањето во болницата.

Истражните органи лоцираа дека бебето било посвоено во март 2023 година, по што веднаш било подложено на континуирано физичко, психолошко и сексуално злоставување.

Полицијата на телефоните на двајцата обвинети пронашла бројни фотографии и видеоснимки на кои било детално документирано долготрајното малтретирање. Официјалните медицински податоци покажаа дека детето претрпело вкупно 40 трауматски повреди, меѓу кои десетици надворешни модринки, внатрешни повреди и скршена рака.

Како официјална причина за настапувањето на смртта кај 13-месечниот Престон, патолозите ја наведоа акутната опструкција на горните дишни патишта.

Според завршните зборови на обвинителството, Варли е директно одговорен за фаталниот напад, додека неговиот партнер е осуден поради неспречување на суровото злоставување.

Трагедија во Германија: 20-месечно бебе почина во жежок автомобил, мајката го оставила за да оди на работа