Три супертанкери под саудиско знаме, кои превезуваа 6 милиони барели сурова нафта, пловеа низ Ормускиот теснец, неколку часа откако американскиот претседател Доналд Трамп потпиша договор со Иран за ставање крај на војната што ги наруши глобалните снабдувања со енергија, објави „Ројтерс“.

Позициите на другите танкери што поминале низ Теснецот беа прикажани на јавни платформи за следење на бродови, откако бродовите неколку недели ги криеја своите патувања при транзитирање низ водниот пат.

Ова се најголемите испловувања од саудиските пристаништа низ Теснецот во последните недели, според анализата на „Ројтерс“ за движењето на бродовите.

Саудиска Арабија главно го користеше својот терминал во пристаништето Јанбу на Црвеното Море за испорака на нафта, поради конфликтот што започна на 28 февруари и поради кој стотици милиони барели нафта не можеа да ги напуштат пристаништата по вообичаената рута низ Ормускиот теснец.

Потпишан договор

САД и Иран вчера го објавија текстот на привремениот договор за завршување на војната потпишан од нивните претседатели, иако Трамп се закани со продолжување на нападите и смрт на ирански функционери доколку не ги исполнат своите обврски.

Танкерот од Хонг Конг, Афрамакс Тонг Лин Ван, кој натовари нафта од рафинеријата Руваис во Абу Даби на почетокот на март и оттогаш остана во Заливот, денеска помина низ Теснецот.

Танкерот за течен природен гас Мраих, управуван од „Катар Енерџи“, исто така помина низ Теснецот. Друг танкер со среден дострел, под знамето на Хонг Конг, Је Чи, помина покрај иранскиот остров Ларак, но оттогаш застана во Ормускиот Теснец.

И „Тонг Лин Ван“ и „Је Чи“ се управувани од „КОСКО Шипинг Енерџи Транспортејшн“, покажаа податоците на ЛСЕГ.

Америка и Иран го потпишаа мировниот договор порано од предвиденото