Евролига: Кошаркарите на Монако закажаа „мајсторка“ против Фенербахче
Екипите на Монако и Фенербахче во „мајсторка“ ќе одлучат кој ќе оди на Фајнл-фор турнирот во Евролигата.
Во четвртиот меч од серијата, кошаркарите на Монако победија во Истанбул со резултат 65:62 (11:15, 19:18, 18:14, 17:15) и израмнија на 2:2, па во „Кнежевството“ ќе се одлучува за патникот во Берлин.
Во редовите на францускиот претставник Окобо постигна 13 поени, а Џејмс и Мотијунас по 10. Решавачка беше тројката на Мајк Џејмс во последната минута од натпреварот.
Кај Турците Марко Гудуриќ постигна 14 поени, Вилбекин 11, а Папајанис и Хејс Дејвис по 10.
Ова е трета серија во која ќе одлучува „мајсторката“, Реал ја елиминираше Басконија и се пласираше прв на Ф4, а „мајсторки“ ќе одлучуваат и на натпреварите Панатинаикос – Макаби и Барселона – Олимпијакос.