Германското Министерство за надворешни работи соопшти дека нивната иницијатива за собирање поддршка за зајакнување на украинската противвоздушна одбрана успеала да собере над милијарда евра, а ова беше соопштено при денешната посета на шефицата на германската дипломатија, Аналена Баербок, на Киев.

Германското Министерство за надворешни работи истакна дека целта на посетата на министерот е да ја увери украинската страна дека и покрај влошената ситуација во борбената зона, Германија и Европа ќе продолжат цврсто да стојат на страната на Украина и нема да престанат да ја поддржуваат.

„Во овој контекст треба да се разгледа и глобалната иницијатива за зајакнување на воздушната одбрана, која министерството за надворешни работи неодамна ја покрена заедно со министерот за одбрана Писториус“, соопшти германското Министерство за надворешни работи.

Според извештајот, финансирањето на иницијативата е обезбедено од Белгија, Данска, Канада, Холандија, Норвешка и Обединетото Кралство.

Покрај тоа, Белгија, Обединетото Кралство, Шпанија, Литванија, Романија, САД и Франција ветија дека ќе помогнат со „опрема и проектили“.

Од своја страна, Латвија изрази желба да се приклучи на иницијативата.

Германското издание Билд претходно објави дека германската влада бара дополнителни средства за зголемување на воената поддршка за Украина во 2024 година.