Кошаркарите на МЗТ Скопје Аеродром славеа и во вториот натпревар од финалмата серија во Првата македонска лига против Пелистер (80:75) за големи 2:0 пред преселбата во Битола. Пелистер имаше одличен почеток, во осум минути направија огромни 22:8. Но, во двете минути кои следуваа, актуелниот шампион се врати со своја серија од осум поени, за 16:22 по една одиграна четвртина.

Имаа гостите од Битола водство од 28:22, но потоа следуваше уште една серија на „металците“ по која дојде и до промена на водството. По тројката на Делалиќ, МЗТ Скопје поведе со 31:30. Ефикасната игра им донесе уште повисока позитива (46:39), кога се играше 18 минута, за првото полувреме да заврши со предност на „сино-белите“ од 46:43.

МЗТ Скопје беше екипата која подобро „го отвори“ второто полувреме. На средина од третиот период имаа сосема солидни 56:48, потоа и 60:51. Битолчани намалија на 57:63, но не направија и нешто повеќе од тоа во тој дел од финалето.

Финалните 10 минути од втората пресметка двете екипи го дочекаа со резултат 68:59 за онаа која го брани шампионскиот пехар. Онаа која го напаѓа ги реализираше првите два напади, за ново доближување, сега на 63:68. Во средишниот дел, по поените на Маслинко, Пелистер беше „во игра“, резултатски (70:76). Мини-серијата репрезентативното крило ја продолжи да симне уште малку од негативата (73:76).

Но, во оние три и пол минути кои останаа гостите не најдоа начин да стигнат до посакуваното. Танасковиќ и Д.Стојановски го вратија првакот на 80:73, по што веќе Пелистер немаше сили за евентуално целосно враќање. Танасковиќ во редовите на МЗТ заврши со 16 поени, а кај „зелено-белите“ Костоски запиша 17. Третиот меч од финалната серија ќе се игра на 25 мај (сабота) во салата „Боро Чурлевски“ во Битола.