ЕУ го поздрави договорот меѓу Македонија и Бугарија: Важен чекор напред во соработката меѓу двете земји
Европската Унија го поздрави договорот меѓу Македонија и Бугарија за изградбата на тунелот за железницата на Деве Баир како чекор за градење доверба меѓу двете земји чии односи се прилично напрегнати.
Препорачано
Претседателот на Европскиот совет, Антонио Кошта, за свеченоста во Ѓуешево реагираше на Икс:
„Го поздравувам потпишувањето на договорот за прекуграничниот тунел на Коридорот 8 меѓу Бугарија и Северна Македонија – голем чекор напред во соработката меѓу двете земји и промоција на добрососедските односи. Освен што развива билатерални врски, новата железница ќе го поттикне регионалниот просперитет и ќе ја зајакне нашата заедничка безбедност“, стои во објавата на Кошта.
Еврокомесарката Марта Кос го оцени договорот меѓу двете земји како важен чекор за градење доверба преку регионална поврзаност.
„Бугарија и Северна Македонија се согласија да ја продолжат работата на Коридорот 8. Клучен проект што ги поврзува Јадранското Море со Црното Море преку пат и железница. Ова е важен чекор за градење доверба преку регионална поврзаност, заеднички просперитет и комуникацијата меѓу луѓето“, напиша таа.
Bulgaria & North Macedonia agreed to advance work on Corridor VIII.
A key project connecting the Adriatic Sea with the Black Sea via road & rail.
This is an important step to build trust through regional connectivity, shared prosperity & people to people contacts.
— Marta Kos (@MartaKosEU) November 6, 2025
Договорот за изградба на тунелот го потпишаа вчера министрите за транспорт на двете земји, Александар Николоски и Гроздан Караџов. Потпишувањето на овој договор беше голема промена на ставот на Николоски и други претставници на владата, кои пред една година тврдеа дека парите за оваа пруга нема да ја градат и парите ќе ги пренасочат за изградбата на железницата кон Солун. Кога НАТО ја стави пругата кон Софија како важен сегмент за тактичката и воена поврзаност, македонската влада го смени наративот. Присуството на американската амбасадорка Анџела Агелер на церемонијата во Ѓуешево најдобро зборува за американскиот интерес, поддршка, па и притисок за целиот проект.
