ЕСМ: Блок 1 во РЕК Битола е исклучен од мрежа заради ремонтни активности
Блок 1 во РЕК Битола утрово е исклучен од мрежа заради интервенции во цевкодниот систем на постројката, сервисни и ремонтни активности на млинските кола и нега на постројките во машинската сала на блокот, информираат од ЕСМ.
Од ЕСМ очекуваат блокот да биде ставен во функција во следните 24 до 48 часа. Велат дека во овој период целосно се задоволени потребите за електрична енергија на конзумот со производство од останатите свои капацитетите и нема увоз на електрична енергија.
Потсетуваме дека заради енергетската криза во која се наоѓа земјата и потребата од постојано и зголемено производство на електрична енергија, ремонти и санација на блоковите не се изведуваат како што вообичаено тоа се прави, со застои на производствениот процес на блок во период од 60 до 90 дена. Сите неопходни зафати во овој период се прават кога се апсолутно неопходни или кога ќе се укаже можност за тоа, се вели во соопштението.
Додаваат дека во моментов Блок 2 и Блок 3 работат без проблем, а ремонтни активности на Блок 2 се предвидени за следната недела.