Британскиот премиер Борис Џонсон денеска го поздрави ветувањето на повеќе од сто светски лидери за прекин на уништувањето на шумите во светот до 2030 година, пишува Би-Би-Си.

На вториот ден од климатскиот самит на ОН COP26 во Глазгов, 110 нации, кои поседуваат 85 отсто од светските шуми, потпишаа декларација со која се обврзаа да го запрат и променат трендот на уништување на шумите и уништување на почвата до 2030 година.

Домаќинот на самитот, Џонсон, истакна дека целта за ограничување на глобалното затоплување на 1,5 степени Целзиусови не може да се постигне без заштита на природата и запирање со загубите на шумите, што се „белите дробови на планетата”.

Заштита на правата на домородното население

Тој кажа дека ова мора да се направи на таков начин што ќе ги заштити правата на домородното население, истовремено создавајќи можности за одржлив економски развој.

„Да прекинеме со големиот масакр со моторни пили“, рече тој, истакнувајќи дека заштитата на животната средина може да овозможи долгорочен одржлив раст и вработување.

Британската Влада соопшти дека ветувањата дадени на самитот биле поддржани со 8,75 милијарди фунти јавни средства и дополнителни 5,3 милијарди евра приватни инвестиции.