Џејмс Ван Дер Бик изјави дека се чувствува благодарен, иако имал тешка година. Во интервју за емисијата „Тудеј“ (Today) со Крејг Мелвин, зборуваше за својата тековна здравствена состојба, како и за времето кога во 2023 година му беше дијагностициран рак во трет стадиум.

„Бев во шок, но тоа истовремено беше една од работите поради кои кога ги добив тие вести си помислив: Ова ќе биде најдобрата работа што ми се случила некогаш. Имав тој мал глас во глава што кажуваше: Ќе направиш промени во својот живот што никогаш не би ги направил да ја немаш оваа дијагноза. Тоа ќе додаде среќни години на твојот живот“, порача актерот.

Ван Дер Бик истакна дека ракот му помогнал да ги цени работите.

„Мислам дека претходно не знаев што значи да се успори. Не знаев што значи навистина да ја погледнам секоја работа што ја јадам, сè што внесувам во своето тело. Она што сфатив е дека сè уште сум вреден за љубов и своја и Божја“, рече тој.

Исто така, појасни дека борбата со рак му помогнала повеќе да ги цени малите моменти во животот.

„Присутноста е навистина дар што ми го даде ракот. Не би бил жив ако не беше мојата сопруга. Таа навистина се издвои како негувателка, како медицинска сестра, како глава на домот. И, секако, моите деца“, рече тој.

Тешка одлука

Говорејќи за ракот, изјави дека за него тоа е „работа со полно работно време“.

„Тоа е процес, веројатно ќе биде процес до крајот на мојот живот. Секој месец се чувствувам сè подобро“, додаде тој.

ВИДЕО | Џејмс Ван Дер Бик проговори за битката со ракот: Ми ги одзеде сите улоги што ги имав во мојот живот