Дваесетгодишна девојка од Скопје почина од грип на Клиниката за инфективни болести. Таа е седмата и намјлада жртва на грипот годинава. На Инфективната Клиника била префрлена од Клиниката за хематологија без да се прецизира за која болест била испитувана. Девојката не била вакцинирана против грип. Министерството за здравство годинава набави 60 илјади дози вакцини наменети за лицата од ризичните групи меѓу кои лицата над 60 години, бремените жени и лицата со коморбидитети и сите дози се потрошија. Комисијата за заразни болести препорача во сите здравствени установи да се носат маски а во домовите кои згрижуваат стари лица да се забранат посетите откако во државата почна сезоната на респираторни инфекции, инфлуенца и ковид. Грипот може да биде кобен за лицата со тешки хронични заболувања. Низ целата држава има тешки случаи на заболени од грип проследени со пневмонии а двајца пациенти се на респиратор. Институтот за јавно здравје минатата недела регистрираше 1675 заболени од грип што е зголемување за 41 процент споредено со неделата претходно.