Првата делница од автопатот Скопје-Блаце, долга само два километра и единствена од автопатот што ја гради македонската држава, нема да биде изградена навреме, бидејќи, како што денеска објаснуваше директорот на Јавното претпријатие за државни патишта Ејуп Рустеми, тешко одела експропријацијата на земјиштето, а на терен се појавиле и „други непредвидени ситуации“.

Автопатот од Скопје до косовската граница деновиве е актуелен во јавноста, по информациите дека неговата изградба ќе чини 19 милиони евра по километар – цена што е речиси двојно повисока од онаа што ја платија косовските власти за автопатот од Приштина до македонската граница, комплетно пуштен во употреба уште пред три години.

Лани во ноември беше соопштено дека двокилометарската делница, единствена на автопатот што со свои средства ја гради македонската држава, ќе чини 14,2 милиони евра и ќе биде готова до средината на оваа година.

„Требаше да се проектира нов потпорен ѕид со должина од 280 метри и да се проектираат косините на оваа делница. Проектите се готови, но поради законските правила за јавни набавки, мораше одново да го отвориме процесот за овие два километра“, рече Рустеми

За втората делница од 10 километри, како што кажа Рустеми, проектот е на ревизија согласно правилата на Европската банка за обнова и развој (ЕБОР), која ќе ја финансира оваа делница со 120 милиони евра. Заемот од ЕБОР за десетте километри автопат до косовската граница, македонските граѓани ќе го враќаат 16 години.

„Идејниот проект за втората фаза е завршен, студијата за животна средина деновиве ќе ја доставиме до ЕБОР. Очекувам во првиот квартал од следната година да имаме и основен проект и да бидат завршени и инфраструктурните проекти, за да можеме да ја започнеме постапката за избор на фирма-изведувач”, рече Рустеми.