Димитар Митровски повикан за натпреварите против Италија и Малта
Селекторот на македонската А фудбалска репрезентација, Благоја Милевски наскоро треба да го објави списокот со фудбалери на кои ќе смета за новите натпревари од квалификациите за ЕП 2024.
На 9 септември на Националната арена „Тодор Проески“ во Скопје нашите најдобри фудбалери ќе играат против актуелниот европски шампион Италија, а три дена подоцна ќе ѝ гостуваат на Малта.
Хрватскиот клуб Вараждин објави дека во составот на повикани во македонската репрезентација ќе биде и Димитар Митровски (24) кој игра на позицијата десно крило и може да придонесе во делот на нападот.
– Нашиот Димитар Митровски е на списокот за претстојните натпревари на Македонија. Ти честитаме Димитре – со среќа! – стои во објавата на НК Вараждин.
Инаку Вараждин има добар почеток во новата сезона од хрватскиот шампионат, нема пораз по првите четири кола, се наоѓа на четвртото место со шест бодови.
Митровски редовно има настапи, веќе и двапати се запиша во листата на стрелците, по еден гол во мечевите со Славен Белупо (2:2) и Локомотива Загреб (3:3).