Дијамант од 16,64 карати во форма на срце откриен во рудник во Русија
Дијамант во форма на срце од 16,64 карати е пронајден во рудникот Ломоносов во областа Архангелск во Русија, соопшти денеска прес-службата на руската компанија „Севералмаз“.
„Необработениот дијамант во облик на мало срце е откриен на 8 април. Неговата тежина е 16,64 карати“, објави компанијата на својата официјална страница на социјалната мрежа VKontakte.
Дијамант од 92,34 карати со ретка заматена форма беше откриен на локацијата во 2022 година, потсети ТАСС.
Регионот Архангелск е единственото место во Европа каде има рудници за дијаманти, пренесува Танјуг.
Прес-службата соопшти дека во март 2023 година на наоѓалиштето биле откриени уникатни камења. Вклучувајќи жолти и розови дијаманти во групата со големина од +1,8 карати.
Претходно, беше ископан изометриски кристал со жолто-зелена нијанса со овални ребра, тежок 8,98 карати.
Посебно внимание на геолозите привлече и фрагментот на виолетов дијамант со тежина од 5,42 карати.
Претходно беше објавено дека необичен розов дијамант ќе се најде на аукција на „Сотби“ во летото 2023 година. Почетната цена на дијамантот ќе биде 35 милиони долари.