Европскиот парламент и владите на земјите членки влегуваат во последната фаза од преговорите за воведување на дигитално евро, откако европратениците ја потврдија својата преговарачка позиција во Стразбур. Најголемите предизвици во преговорите ќе бидат договорот за надоместоците и како ќе бидат компензирани банките и давателите на услуги за плаќање, објавува Еуроњуз.

Дигиталното евро е дизајнирано како електронска форма на пари на централната банка, издадени и гарантирани од Европската централна банка (ЕЦБ). Не е наменето да ги замени готовината или постојните банкарски услуги, туку да ги надополни.

Граѓаните би ги чувале дигиталните евра во посебен дигитален паричник, при што износот што може да се чува допрва треба да се утврди. Системот ќе поддржува онлајн и офлајн плаќања и е дизајниран да гарантира високо ниво на приватност, што значи дека ЕЦБ нема да може директно да ги идентификува корисниците според нивните плаќања.

ЕЦБ ќе ја обезбеди основната инфраструктура, додека комерцијалните банки и давателите на услуги за плаќање ќе им нудат услуги за дигитални евра на корисниците.

Според три извори вклучени во преговорите, најчувствителното прашање ќе биде постигнувањето договор за таканаречениот „модел на компензација“. Ова се однесува на одлучувањето кои финансиски институции треба да бидат компензирани, колку и како ќе им биде платено за обезбедување услуги со дигитално евро.

Друго клучно прашање во преговорите се однесува на распределбата на надоместоците во синџирот на плаќање. Се очекува трговците да плаќаат пониски надоместоци отколку што моментално плаќаат за трансакции со картички.

Најнапредната фаза од преговорите се очекува оваа есен, а конечното одобрување на законската рамка би можело да следи до крајот на годината. Се очекува дигиталното евро да стане достапно за плаќања во продавниците од 2029 година, по пилот-програмата што се очекува да започне во 2027 година.