Репрезентацијата на Данска обезбеди пласман во полуфиналето на Светското првенство во Египет, откако во неверојатен натпревар го победи домаќинот со 39:38 и тоа по подобро изведување на седмерците откако претходно ниту продолженијата не го дадоа победникот иако и двете селекции имаа шанси порано да триумфираат.

Актуелниот светски шампион во полуфиналето ќе се сретне со подобриот од натпреварот помеѓу Шпанија и Норвешка.

Натпреварот започна со подобра игра на Египет кој ја остави Данска шест минути без постигнат гол, но потоа се разигра Микел Хансен кој донесе израмнување (4:4), а потоа во финишот од првиот дел Данците одиграа далеку подобро и на одмор заминаа со три гола разлика (13:16).

„Фараоните“ на стартот од вториот дел многу брзо ја анулираа предноста и до финишот на натпреварот се играше максимално неизвесно. Во 57. минута Ларсен донесе предност од 27:26, но Египет одговори со два гола преку Омар Јахја и во последните 40 секунди дојде до предност од 27:28. Ларсен постигна експресен гол, но ракометарите на Египет наместо напад за триумф поради почетничка грешка им дадоа шанса на Данците да славаат. Имено, поради погрешна измена, Махмуд доби исклучување, но Данска не успеа да реализира и натпреварот замина во продолженијата.

Во првото продолжение Данска имаше шанса да ги реши дилемите и да се пласира во полуфуналето, но најдобриот играч Микел Хансен направи глупост. Имено, при 34:33 за Данска, Хансен на една секунда до крајот кога им беше одземена топката, наместо даја остави на теренот, тој ја додаде до соиграч по што судиите откако ја прегледаа снимката му доделија црвен картон и пенал за Египет кој кој реализираше Санад, по што натпреварот замина во второ продолжение.

Во второто полувреме, Египет постојано беше во водство и имаше можност да слави, но во последните секунди по прекршокот на данскиот ракомет, играчот на Египет не се врати на линијата од шест метри за да дозволи изведување на топката и поради тоа доби црвен картон, а Данска со гол од пенал го однесе натпреварот во пенал рулетот.
Таму се истакна Никлас Ландин кој одбрани два седмерци што беше доволно за пласман во полуфиналето.
Хансен со десет постигнати голови беше најпрецизен во редовите на светскиот шампион, додека Јахја исто така даде десет гола за Египет.